Kap kominn til heimahafnar

Kap II VE-7 er kominn til heimahafnar í Eyjum eftir að hafa stundað grálúðuveiðar við austurströndina frá því í byrjun júlí. Veiðarnar gengu vel og aflinn var alls 660 tonn.

Þetta kemur fram á vef Vinnslustöðvarinnar í Vestmannaeyjum. Segir þar að Kap II hafi landað á Eskifirði og sótt alla þjónustu þangað og til Reyðarfjarðar.

„Samstarf við alla aðila þar var mjög gott og verðskulda Austfirðingar bæði hrós og þakkir af því tilefni,“ segir á vefnum.

„Eftir árangursríkt grálúðuúthald á Kap II flytja Kristgeir A. Ólafsson skipstjóri og menn hans sig yfir á Glófaxa VE. Vinnslustöðin keypti sem kunnugt er Útgerðarfélagið Glófaxa ehf. sem hefur gert út Glófaxa VE um áratuga skeið. Skipið heitir nú Sleipnir VE-83 og mun Vinnslustöðin gera það út undir því nafni. Sleipnir VE veiðir á næstu mánuðum þorsk, ufsa og skötusel í net.“

• Blogga um frétt