Hræringar í atvinnulífi í Þorlákshöfn

„Það er blóðtaka fyrir plássið að Frostfiskur hætti starfsemi hér og yfir 50 störf flytjist annað,“ sagði íbúi í Þorlákshöfn sem rætt var við í gær. Forsvarsmaður Frostfisks segir að í ljósi aðstæðna hafi fyrirtækið orðið að skipuleggja starfsemina upp á nýtt. Talsverðar hræringar hafa verið í atvinnulífi í Þorlákshöfn síðustu ár.

Frostfiskur flytur um áramót í nýlegt húsnæði sem áður hýsti fiskvinnslu Storms Seafood við höfnina í Hafnarfirði. Í fyrrahaust sagði Frostfiskur upp 40 starfsmönnum af um 110 manns í Þorlákshöfn og í ár hefur starfsfólki fækkað um 20 í viðbót. Þorgrímur Leifsson, framkvæmdastjóri Frostfisks, segir að öllu starfsfólkinu í Þorlákshöfn verði boðin störf í Hafnarfirði og reiknar með að þar starfi 40-50 manns. Fólkinu verði boðið upp á ferðir á milli staðanna fyrsta árið.

Litið yfir Þorlákshöfn. mbl.is/Sigurður Bogi

Rússland, Nígería, Brexit

„Allur kostnaður í rekstrinum hefur rokið upp, meðan tekjurnar hafa dregist saman,“ segir Þorgrímur. „Laun hafa hækkað um tugi prósenta á síðustu tveimur árum og íslenska krónan hefur verið óhagstæð. Á sama tíma er Rússland lokað, Nígería hálflokuð og Brexit hefur valdið óstöðugleika. Þegar margir lykilþættir leggjast á eitt hefur slíkt afleiðingar og kallar á aðgerðir.“

Þorgrímur segir að húsnæðið í Þorlákshöfn sé um 4.500 fermetrar, en í Hafnarfirði um tvö þúsund fermetrar. Þar verði öll starfsemi einfaldari og mikilvægt sé að vera nær höfuðborginni hvað varðar flutningskostnað. Þá verði auðveldara að sinna innanlandsmarkaði. Fyrirtækið hefur á síðustu árum unnið úr 10-12 þúsund tonnum af fiski í Þorlákshöfn og er fiskurinn keyptur á markaði. Mest af framleiðslunni fer með flugi til dýrra verslunarkeðja víða um heim. Þá er fyrirtækið með þurrkverksmiðju í Ólafsvík, Klumbu, og vinnur úr álíka miklu hráefni þar. Frostfiskur á húsnæðið við höfnina í Þorlákshöfn og segir Þorgrímur óljóst hvað verði gert við það.

Fjallað er ítarlega um gang atvinnulífsins í Þorlákshöfn í Morgunblaðinu í dag