Á hverju ári brenna inni aflaheimildir í ufsa innan fiskveiðikerfisins, svo skiptir þúsundum tonna. Þetta er fullyrt í tilkynningu frá smábátafélaginu Hrollaugi á Hornafirði.

Félagið fordæmir allar gerðir brottkasts á sjávarafla við fiskveiðar í kringum landið, „hvort sem það er í formi þess að veiddum fiski sé kastað fyrir borð á bátum sem stunda fiskveiðar í kringum landið eða í formi þess að aflaráðgjöf á ufsa er látin brenna inni svo skipti þúsundum tonna á hverju ári sem er ekki síður alvarlegt brottkast.“

Ufsi vannýtt tegund á Íslandsmiðum

„Á hverju ári brenna inni aflaheimildir í ufsa innan fiskveiðikerfisins svo skiptir þúsundum tonna og hefur gert í mörg ár sem enginn fær að nýta. Á sama tíma er strandveiðikerfið svelt og menn hafa þurft að stöðva báta sína eftir örfáa róðra í mánuði,“ segir í tilkynningunni.

„Það er staðreynd að ufsi er vanýtt tegund á Íslandsmiðum og látið viðgangast af ríkinu ár frá ári sem er í okkar augum alvarlegt brottkast á atvinnutækifærum og verðmætasköpun þjóðarinnar  og því ætti allur meðafli þorsks innan strandveiðikerfisins að vera með öllu frjáls því nóg er óveitt af ufsa á hverju ári.. Strandveiðikerfið þarf á þessu að halda núna strax.“

Þá segir að í ljósi nýjustu frétta virðist sem miklum sjávarafla sé kastað fyrir borð skipa í kringum landið.

„Slík umgengni um sjávarútvegsauðlindina er ólíðandi og skapar skekkju á því aflamagni sem veitt er í kringum landið og sóar verðmætum þjóðarinnar, á meðan sum kerfi eins og strandveiðikerfið eru svelt svo um munar af aflaheimildum.“

Allur meðafli þorsks verði frjáls

Félagið skorar í framhaldinu á stjórnvöld, „að leyfa strandveiðar fjóra daga í viku í fjórar vikur á ári í fjóra mánuði á ári án stöðvunar veiða og að allur meðafli þorsks við strandveiðar verði algjörlega frjáls innan strandveiðikerfisins án nokkurra skorða. Það er klárlega svigrúm til þess.“

Tengdar fréttir

Eftirlit með veiðum

Útgerðaraðili sviptur leyfi þrisvar á þremur árum

• Tilkynna drónaeftirlit í mars
• Þrír sviptir leyfi það sem af er ári
• Unnið að aukinni skilvirkni veiðieftirlitsins
• Boðar byltingu í drónaeftirliti Fiskistofu

» Fleiri tengdar fréttir

• Blogga um frétt