Mörg þúsund manns voru viðstaddir þegar stærsta fiskvinnslufyrirtæki Brasilíu, C.Vale, opnaði nýja og nútímalega fiskvinnslu búna vinnslutækjum og kerfum frá Marel.

Vígslan fór fram 20. október en um er að ræða stærstu fiskvinnslu landsins, að því er fram kemur á vef Marel.

Kemur þar fram að Michel Temer, forseti lýðveldisins, Beto Richa, fylkisstjóri Parana, og Blairo Borges Maggi landbúnaðarráðherra hafi verið viðstaddir athöfnina ásamt ýmsum framámönnum í greininni.

Vinnslustöðin er rúmlega tíu þúsund fermetrar að stærð. Mynd úr safni. Ljósmynd/Marel

Samstarfið spannar meira en tvo áratugi

„Nýja vinnslustöðin er rúmlega 10.000 fermetrar að stærð og getur, til að byrja með, unnið allt að 75.000 tilapia-fiska á dag. Hún er á iðnaðarsvæði C.Vale í Palotinu, í Vestur-Parana, þar sem móðurfélagið er einnig með alifuglabú sem vinnur nú um 540.000 kjúklinga á dag,“ segir á vef Marel.

„Samstarfssaga C. Vale og Marel í Brasilíu spannar meira en tvo áratugi. C.Vale var eitt af fyrstu samvinnufélögunum til að setja upp Nuova, sjálfvirka kjúklingavinnslulínu, frá Marel og það heldur áfram að treysta á lausnir frá Marel fyrir fyrirtæki sín. Þetta nýja verkefni boðar ekki bara vatnaskil í fiskvinnslu í Brasilíu heldur styrkir það einnig og viðheldur samstarfi fyrirtækjanna,“ er haft eftir Francisco Leandro, framkvæmdastjóra Marel í Brasilíu.

Tengdar fréttir

Nýsköpun og tækni í sjávarútvegi

Hugmyndafræði Sjávarklasans víða eftirsótt

• Rétt hugarfar hafi átt áhrif á heimsvísu
• Árangur Íslands skólabókardæmi um fullnýtingu
• Vinnslur gætu framleitt eigin sótthreinsiefni úr sjó
• Sjávarútvegurinn er drifinn áfram af gögnum

» Fleiri tengdar fréttir

• Blogga um frétt