Evrópusambandið heldur ofveiðum áfram

Eftir næturlangar viðræður samþykktu ráðherrar Evrópusambandsins snemma í morgun aflamark næsta árs fyrir um 200 fiskistofna. Nær einróma samþykki var um að veiðar á 53 stofnum skyldu miðast við vísindalega ráðgjöf.

Þeim fjölgar því um níu frá síðasta ári, en eru þó enn ekki nema fjórðungur af þeim stofnum sem ráðherrar sambandsins taka ákvörðun um. Það er því ljóst að ofveiðar munu halda áfram úti fyrir ströndum ríkja Evrópusambandsins.

Vefmiðillinn EU Observer, sem varpar út frá Brussel, segir í umfjöllun sinni að veiðar allra fiskstofna þurfi að vera orðnar sjálfbærar í síðasta lagi árið 2020.