„Kaldar kveðjur frá formanni Samfylkingar“

Sjálfstæðismaðurinn Ásmundur Friðriksson gagnrýndi Loga Einarsson, formann Samfylkingarinnar, harðlega á Alþingi í dag. Vitnaði Ásmundur þar í ummæli Loga sem sagði á mánudag að það væri í lagi þótt einhver útgerðarfyrirtæki færu á hausinn.

„Það eru kaldar kveðjur sem sjómenn og fiskverkafólk fær frá formanni Samfylkingarinnar,“ sagði Ásmundur og bætti við að í kjördæmi Loga væri öflug smábátaútgerð auk stærstu útgerðarfyrirtækja landsins.

Lestu meira

Í lagi þótt einhver fyrirtæki fari á hausinn

Ásmundur sagði að hagræðingin hefði augljóslega ekki náð þeim markmiðum Samfylkingarinnar að drepa alla einstaklingsútgerð smærri og minni fiskiskipa um land allt.

„Er það svo að formaður Samfylkingarinnar sér ekkert annað við útgerðina en hvað er hægt að kreista úr henni af veiðigjöldum, ella liggi hún bara dauð?“ spurði Ásmundur. 

Hann sagði alla á Alþingi sammála um að útgerðin greiddi veiðigjöld. Hins vegar væru gjöldin komin á það stig að hún væri minni fyrirtækjum afar erfið.

„Er formanni Samfylkingarinnar skítsama um útgerð á landsbyggðinni?“

Logi Einarsson. mbl.is/Kristinn Magnússon

Þetta er blóðug saga

Logi bað um að fá að svara ræðu Ásmundar og sagði hann taka orð sín úr samhengi. „Engu að síður er þetta kærkomið tækifæri til að ítreka það sem ég hef verið að tala um, það er auðvitað ekki markmið að taka meiri gjöld en svo að útgerðin geti borið það,“ sagði Logi.

Hann sagði það líka skipta máli að þjóðin fá hámarksarð af sameiginlegri auðlind sinni og benti á að Samfylkingin hefði lagt til, ásamt fleiri flokkum, breytingar á fiskveiðistjórnunarkerfinu. Þær gangi út á það að útgerðin greiði það sem hún geti en ekki meira en það.

„Ég talaði um að það þyrfti að verja hinar veiku byggðir en það hefur fiskveiðistjórnunarkerfið okkar ekki gert. Þvert á móti er þetta blóðug saga þrjá til fjóra áratugi aftur í tímann,“ sagði Logi.

• 1 blogg um fréttina

Bloggað um fréttina

• Halldór Egill Guðnason: Veruleikafirrtur Samfylkingarleiðtogi.