Írskir sambandssinnar æfir út í Kia

Kia segist einungis hafa smíðað Provobílinn fyrir sýninguna í Genf. mbl.is/Kia

Suður-kóreski bílaframleiðandinn Kia á ekki upp á pallborðið hjá írskum sambandssinnum  vegna nafngiftar á nýjasta sköpunarverki sínu, Provo-bílnum.

Nafn þetta er hið sama og notað var um hryðjuverkasveitir írska lýðveldishersins (IRA) á Norður-Írlandi og því ýfir það upp gömul sár þar í landi.

Tveir þingmenn flokks sambandssinna á breska þinginu, Gregory Campbell og William McCrea, hafa lagt fram þingsályktunartillögu þar sem Kia er hvatt til að finna nýtt nafn á „Provo-módelið“ þar sem núverandi nafn minnir fólk á „ógnarverk og mannvíg“ vígamanna IRA. 

Kia hefur svarað því til að það áformi enga sölu á bílnum í Bretlandi og hugmyndabíllinn sem sýndur er á bílasýningunni í Genf um þessar mundir hafi aðeins verið smíðaður sýningarinnar vegna. Talsmaður Kia í Englandi bætti því við, að með hinni óheppilegu tengingu sem nafngiftin hafi haft í för með sér hafi verið með öllu tilviljun og ekkert misjafnt hafi legið að baki henni.