Allir sem hafa áhuga á bílum vita sem er að vel hannaðir bílar eru listaverk út af fyrir sig. Það finnst Arthur Schening líka, en hann er grafískur hönnuður og teiknari með alvarlega bíladellu.
Schening, sem starfar hjá og stýrir hönnunarstofunni Schening Creative, hefur sérstakan áhuga á kappakstursbílum af gamla og klassíska skólanum, frá 6., 7. og 8. áratugnum, enda segir hann þá einkar fallega og áhugaverða.
Hann hefur teiknað upp yfir 20 slíka og er serían til sölu á vefsvæði hans. Þar á meðal má finna myndir af molum á borð við Ferrari 121 LM, Jaguar D-Type, Shelby Daytona Coupe, Lotus 49 og Porsche 956.
Eins og meðfylgjandi myndir sýna er um mikil listaverk að ræða og þarf það ekki að koma á óvart þegar haft er í huga að fyrirmyndirnar eru ekkert slor. Úrvinnsla Schenings er til stakrar fyrirmyndar og erfitt að ímynda sér að sá bílaáhugamaður sé til sem ekki hefði áhuga á mynd eftir Schening uppi á vegg hjá sér.
jonagnar@mbl.is