Það er óhætt að segja að Bono, söngvari U2, kunni ekki aura sinna tal.
Eftir þrjá og hálfan áratug í bransa sem hefur gefið ákaflega vel í aðra hönd fyrir Írann smávaxna, að ekki sé minnst á slyngar fjárfestingar í Facebook og víðar, er svo komið að hann hefur ráð á að veita sér flest sem hugurinn girnist. Bílar eru þar með taldir.
Engu að síður er það svo að á meðan Bono á heimili víðsvegar um heiminn, þar á meðal eldfornt óðalssetur fyrir utan Dublin og lúxus-þakíbúð í háhýsi í New York, þá er bílafloti kappans með tiltölulega lágstemmdu móti. Mörg dæmi eru þess að fólk með álíka fjárráð fari á talsvert meira flug þegar kemur að því að kaupa sér farkost, hvort sem menn telja hófsemi hans í þessum efnum til lofs eða lasts.
Ef til vill má segja að bílarnir endurspegli Bono ágætlega því þar er bæði að finna umhverfisvænan rafbíl og bensínfrekan lúxusvagn – og sitthvað þar á milli. jonagnar@mbl.is