Konur falla oftar á bílprófi en karlar

Er annað kynið betra en hitt þegar akstur er annars vegar? Um það hefur verið deilt áratugum saman og verður eflaust svo um alla ókomna framtíð – allavega þar til engir bílar verða til aðrir en sjálfeknir.

Í ljósi nýjustu tíðinda frá Bretlandi vaknar sú spurning hvort konur séu lakari bílstjórar en karlar. Ný opinber tölfræði leiðir nefnilega í ljós, að konur eru miklu gjarnari á það en karlar að falla á bílprófi.

Á fyrsta prófi falla 7% fleiri konur 17 ára en bilið eykst jafnt og þétt á þann veg að fimmtugar konur og eldri falla 50% oftar á bílprófi en karlar. Hjá tvítugum falla 15% fleiri konur en karlar, 25% hjá þrítugum og 41% hjá 35 ára.

Karlmenn heldur borubrattari

Af þessu munu karlar sennilega gorta – en tæpast af því sem nú segir; þeir keyra miklu oftar á en konur. Enda segja æðstu menn félags bifreiðaeigenda í Bretlandi (AA) að konur beri meiri virðingu en karlar fyrir öryggi á vegunum eftir að þær hafa náð prófi. Alls voru 113.066 karlar undir stýri í umferðarslysum í Bretlandi í fyrra og 69.245 konur.

Til viðbótar þessari tölfræði hefur könnun AA leitt í ljós, að konur eru fjórfalt líklegri en karlar að viðurkenna að maður þeirra sé betri ökumaður en þær sjálfar. Um 28% kvenna játuðu að maki þeirra væri færari undir stýri en aðeins 7% karlar voru sama sinnis.

Konurnar betri í bóklega hlutanum

En það þýðir ekki að sama hlutfall kvenna telji maka sinn öruggari í umferðinni, þvert á móti. Alls 37% kvennanna sögðu sig miklu varfærnari ökumenn og aðeins 13% nefndu þar lífsförunaut sinn. Aðeins 16% karla eru á því að maki þeirra sé betri undir stýri en þeir, ef marka má tölurnar. Upplýsingar frá bresku umferðarstofunni (DVSA) leiðir í ljós að konur standa sig betur á bóklegu bílprófi en karlar. Í landinu eru 1.395 prófdómarar, þar af 381 kona.