Volkswagen stærsti bílsmiðurinn
Setja bókamerki
Volkswagen tók fram úr Toyota sem stærsti bílaframleiðandi heims við lok fyrri hluta ársins og það þrátt fyrir þverrandi bílasölu í Bandaríkjunum vegna útblásturshneykslis.
Alls seldi Volkswagen 5,12 milljónir bíla frá áramótum til júníloka. Samkvæmt tilkynningu Toyota seldi japanski bílsmiðurinn 4,99 milljónir bíla á sama tíma.
Um er að ræða samdrátt upp á 0,6% frá fyrra ári í tilfelli Toyota. Aftur á móti er um 1,5% aukningu að ræða hjá þýska bílsmiðnum, VW.
Þetta er annað árið í röð sem Volkswagen er söluhæsti bílaframleiðandinn á miðju ári. Á seinni hluta ársins tók Toyota fram úr. Síðar kemur í ljós hvort fyrirtækið verður ofan á í árslok.
Þriðji stærsti bílsmiðurinn um mitt ár er General Motors (GM) sem seldi alls 4,76 milljónir bíla til júníloka. Í fjórða sæti er samsteypa Nissan og Renault með samtals 4,3 milljónir bíla. Þar af seldust 2,74 undir merkjum Nissan og 1,57 milljónir undir merkjum Renault.
