Vegna deilu við tvo birgja hefur Volkswagen ákveðið að stöðva smíði á hinum vinsæla Golf í 10 daga í aðalsmiðju sinni í Wolfsburg í Þýskalandi. Færiböndin voru stöðvuð um helgina vegna yfirvofandi skorts á íhlutum og verða ekki ræst aftur fyrr en 29. ágúst.
Þetta ógnar áætlunum Volkswagen fyrir árið en úr smiðjunni í Wolfsburg hafa runnið 815.000 bílar það sem af er ári, þar af tæplega 500.000 Golf og Golf Sportsvan.
Birgjarnir tveir sem Volkswagen á í stríði við eru fyrirtækin Car Trim og Automobilguss. Hið fyrrnefnda framleiðir áklæði bílsæta fyrir VW og hið síðarnefnda íhluti í gírkassa. Hættu þau að senda vörur sínar til VW í byrjun ágúst og hefur það leitt til framleiðsluröskunar í ýmsum bílsmiðjum þýska risans. Saka fyrirtækin Volkswagen um að hafa rift ýmsum framleiðslusamningum án fyrirvara og án þess að greiða bætur.
Fyrir utan þetta hefur Volkswagen ákveðið að stöðva smíði á Golf í nokkra daga í október og desember vegna umframframleiðslu á módelinu. Alls er um að ræða stöðvun í átta daga, eða 4.-7. október og 19.-22. desember. Segir talsmaður VW verið að rétta framleiðsluna af fyrir fyrsta fjórðung næsta árs og ástæðan sé óvenjumikil smíði á Golf í sumar. Hafnaði hann því að ákveðið hefði verið að smíða 15.000 færri Golf en áætlanir í ársbyrjun kváðu á um.
Golf er langvinsælasti bíll Volkswagen. Frá því framleiðsla á honum hófst árið 1974 hafa selst á fjórða tug milljóna eintaka af bílnum.
agas@mbl.is