Fiat Chrysler sakað um blekkingar
Setja bókamerki
Volkswagen er ekki eini bílsmiðurinn sem átt hefur undir högg að sækja í Bandaríkjunum vegna útblásturshneykslis. Nú hefur umhverfiseftirlitsstofnun Bandaríkjanna (EPA) sakað Fiat Chrysler um sambærilegt svindl.
EPA segir að Fiat Chrysler hafi komið tölvubúnaði fyrir í 104.000 pallbílum og jeppum til að hylma yfir losun þeirra á niturefnum umfram lög. Þegar fréttir af þessu fóru af stað í dag lækkuðu hlutabréf í Fiat strax um rúmlega 15%.
Var búnaðinum komið fyrir í 2014, 2015 og 2016 árgerðunum af Jeep Grand Cherokees jeppanum og Dodge Ram 1500 pallbílnum með 3,0 líra dísilvélum.
EPA er nú með til rannsóknar hvort forritin í vélbúnaði þessara bíla jafngildi blekkingarbúnaði. Volkswagen setti blekkingarforrit í um 11 milljónir bíla á heimsvísu og hefur það leitt til tæplega 20 millljarða dollara sekta og bótagreiðsla í Bandaríkjunum einum og sér og varðhalds sex af helstu stjórnendum VW vestra.
Formaður loftgæðastofnunar Kaliforníuríkis, Mary Nichols, sakaði Fiat í dag um að hafa brotið reglur. „Eina ferðina enn ákveður stór bílaframleiðandi að fara á svig við reglur og er gómaður,“ sagði hún.
Fyrir sína parta segist Fiat Chrysler munu sýna fram á að útblástursstýringarnar sem málið snýst um séu fyllilega heimilar og í samræmi við gildandi reglur. Þær falli ekki undir reglur um blekkingarbúnað.
