Metafsláttur hjá Olís eftir stórsigur Íslands

Olís og ÓB veita viðskiptavinum, lykla- og korthöfum, 27 krónu afslátt af eldsneytislítranum í dag eftir öruggan 33-19 sigur Íslands á Angóla á HM í handbolta í gærkvöld.

Olís hét 13 krónu afslætti og síðan aukaafslætti ef Ísland ynni leikinn sem myndi stjórnast af markamuninum. Eftir 14 marka sigur Íslands er afslátturinn því alls 27 krónur á lítrann hjá Olís og ÓB í dag.

„Þetta er mesti afsláttur sem Olís hefur nokkru sinni veitt af eldsneytislítranum og það er bara gaman að viðskiptavinir okkar njóti eftir þennan frábæra sigur íslenska liðsins í gærkvöld. Ég viðurkenni þó að það var skrýtin tilfinning að vera að hvetja strákanna til sigurs með sem mestum mun vegna markamunarins og á sama tíma vera farinn að svitna yfir afslættinum,“ segir Jón Ólafur Halldórsson, forstjóri Olís, í tilkynningu.

„Strákarnir eru vonandi komnir í gang núna og halda áfram á sömu braut í leiknum gegn Makedóníu og vinna hann. Olís og ÓB verða að sjálfsögðu með 13 krónu afsláttinn áfram og markamuninn aukalega. Íslenska liðið stjórnar því afslættinum áfram,“ segir Jón Ólafur ennfremur.

• Blogga um frétt