Ofurhraður heitir nýr Ferrari

Ferrari kynnir alveg splunkunýjan sportbíl á bílasýningunni í Genf í byrjun næsta mánaðar en hann hefur fengið nafnið Ferrari 812 Superfast, eða 812 Ofurhraður.

Eins og nafnið gæti að einhverju leyti verið vísbending um þá er hann búinn 12 strokka V-laga vél. Er bíllinn sagður sá aflmesti í sögu Ferrari. Skilar 6,5 lítra vélin 800 hestöflum til hjólanna. Úr kyrrstöðu í hundraðið kemst 812 Ofurhraður á 2,9 sekúndum og topphraði hans er 340 km/klst.

Tómaþyngd bílsins verður 1.525 kíló og togið 718 Nm við 7.000 snúninga. Reyndar verður 80% togsins tiltækt þegar við 3.400 snúninga.  

Í tilkynningu frá ítalska sportbílasmiðnum segir að í bílnum verði sægur af nýjungum en hann er sagður fulltrúi þeirra V12-vélanna sem birtust fyrst í Ferraribílum árið 1947 eða fyrir 70 árum.

812 Superfast er sagður byggja á arfleifð F12berlinetta og F12tdf. Markhópur væntanlegra kaupenda eru menn sem þurfa öflugan sportbíl sem engum málamiðlunum hefur  verið beittur við hönnun. Því er lofað að það verði sérstök upplifun og ómæld alhliða ánægja að aka honum, hvort sem er í venjulegri umferð eða á keppnisbrautum.