Það sem af er þessu ári er Renault Zoe mest seldi rafbíllinn í Evrópu með 26,6% markaðshlutdeild og hafa selst yfir 11 þúsund slíkir á tímabilinu.
Renault Zoe heldur stöðu sinni sem mest seldi rafbíll Evrópu en allt frá árinu 2015 hefur hann vermt toppsætið á listanum yfir vinsælustu bílana af þessum toga. Kemur þetta fram í nýjum tölum frá EAFO (European Alternative Fuels Observatory).
Fram til 2015 hafði Nissan Leaf verið í fararbroddi en áhugafólk um rafbíla virðist hafa tekið ástfóstri við hinn smáa en knáa Zoe. Ekki hafa vinsældir hans minnkað eftir að framleiðandinn kynnti nýja útgáfu af bílnum í fyrra sem NEDC gefur upp með drægni upp á hvorki meira né minna en 400 km en það er 41 kWh lithium-ion rafhlaða sem tryggir hana.
Talið er að Nissan hyggist rétta úr kútnum með næstu kynslóð Leaf, sem kynnt verður í september næstkomandi, og er fullyrt að sá bíll verði með allt að 60 kWh rafhlöðu. Í dag er markaðshlutdeild Leaf rétt tæp 20%.
Þriðji vinsælasti rafbíllinn í Evrópu er svo BMW i3 með tæplega 13% hlutdeild en fast á hæla hans koma svo dýrari bílar, hvorir tveggja úr smiðju Tesla, og er þar um að ræða Model S og Model X.
Mest seldi tengiltvinnbíllinn í Evrópu það sem af er þessu ári er hinn spræki Misubishi Outlander með 15% hlutdeild. Heldur hann stöðu sinni frá því í fyrra en gefur þó dálítið eftir því í fyrra var hlutdeild hans ríflega 18%.
Á eftir Outlander kemur svo Volkswagen Passat GTE með ríflega 10% hlutdeild og þá ný útfærsla af Mercedes Benz GLC 350e sem notið hefur mikilla vinsælda hjá þeim sem vilja sportlegan jeppling sem hægt er að keyra nokkra tugi kílómetra á rafmagninu einu saman.
Íslenski rafbílamarkaðurinn er nokkuð sér á báti og sést það m.a. á því að Nissan Leaf hefur algjöra yfirburði yfir aðrar tegundir. Það sem af er ári hefur hlutdeild tegundarinnar meðal rafbíla verið tæp 68% og er það í ætt við tölur fyrri ára. Þannig var hlutdeild Leaf á markaðnum í fyrra tæp 62% og árið 2015 var hlutdeildin rúm 52%.
Næstvinsælasti rafbíllinn það sem af er ári er Renault Zoe með 7,4% hlutdeild og þar á eftir kemur sendibíllinn frá Nissan, e-NV200 Evalia. Fjórði söluhæsti bíllinn er svo Kia Soul EV með 6,1%. Athyglisvert er að Volkswagen e-Golf hefur ekki náð sér sérlega af stað og er hlutdeild hans á markaðnum 4,1%.
Af tengiltvinnbílum er Mitsubishi Outlander PHEV vinsælastur hér á landi og sver það sig í ætt við stöðuna annars staðar í Evrópu. Sérstaka athygli vekur hins vegar að Volvo XC90 PHEV, sem er bíll sem kostar yfir 11 milljónir króna, er í öðru sæti með 16,4%. Hefur hann betur á listanum yfir tengiltvinnbílana en Volkwagen Passat GTE sem er með 7,9% og Mercedes GLC 350e sem er með 6,8%. ses@mbl.is