Fleiri Tesla-stöðvar opnaðar á árinu
Setja bókamerki
Rafbílaframleiðandinn Tesla ætlar að opna fleiri ofurhleðslustöðvar á þessu ári og hefur bætt Akureyri við sem stað þar sem koma á upp hleðslustöð. Greint er frá þessu í tilkynningu frá samskiptastjóra Tesla í Noregi, sem sér um íslenska markaðinn, og á uppfærðu Íslandskorti á heimasíðu fyrirtækisins.
Tesla opnaði starfsstöð sína á Krókhálsi og ofurhleðslustöð á síðasta ári, en með áformum félagsins verður hægt að keyra hringinn í kringum landið á rafbílum fyrirtækisins og hlaða þá á stöðvunum.
Samkvæmt korti á vefsíðu Tesla kemur fram að nýju stöðvarnar sem opna eigi verði á Stað í Hrútafirði, Akureyri, Egilsstöðum og Kirkjubæjarklaustri, en í fyrstu áætlunum var ekki gert ráð fyrir Akureyri.
Nú er hins vegar gert ráð fyrir því að stöðvar á Akureyri og Egilsstöðum verði opnaðar á þessu ári, en ekki hefur enn verið gefið upp hvenær hinar tvær stöðvarnar eigi að opna.
Með ofurhleðslu er hámarkshleðslan 120 kW og skilar það um 270 kílómetra drægni Tesla-bifreiða á um hálftíma.
