Enginn rænir Leoncie þrumunni

Sjaldan er lognmolla kringum Leoncie.

Sjaldan er lognmolla kringum Leoncie. mbl.is

Einn er sá ljósgeisli í íslensku tónlistarlífi sem Leoncie heitir. Það hefur sjaldan verið lognmolla í kringum hana, þessa indversku prinsessu, (eða "Icy Spicy Leoncie" eins og hún er stundum kölluð) og hafa menn skiptar skoðanir á henni sem tónskáldi og sem einstaklingi.

Leoncie var á dögunum að ljúka upptökum á nýrri plötu sem fengið hefur hinn ögrandi titil Radio Rapist. Hún hélt alltént að upptökum væri lokið, þegar allt í einu eitt kvöldið að tvö smellin lög spruttu fram í kollinum á henni: "Ég var að fara að sofa þegar þetta laust mig og ég sagði við eiginmanninn minn uppnumin: "Það verða þá 14 lög en ekki 12!"" Lífleg tilbrigði Leoncie skila sér til blaðamanns í gegnum símtólið og augljóst að á ferð er lífsglöð og ákveðin kona.

Radio Rapist verður fimmta plata Leoncie en áður hefur hún gefið út titlana My Icelandic Man (sem var prýdd Jóni Páli Sigmarssyni á kápunni), Story From Brooklyn, Messages From Overseas og loks Sexy Loverboy sem kom út í september í fyrra. Tónlist hennar er mestan part lífleg með reffilegum laglínum og oftar en ekki djörfum og ágengum textum eins og titill væntanlegrar plötu gefur til kynna.

Hún segir að nýja platan verði mikið frábrugðin Sexy Loverboy: "Þessi verður allt öðruvísi og ólík öllu því sem komið hefur á undan. Það er erfitt að segja til um á hvaða hátt hún er frábrugðin en hún verður algjör bomba!"

Fær innblástur við bænir og íhugun

Afköstin eru að sama skapi mikil, sér í lagi ef litið er til þess að Leoncie annast nær allar hliðar útgáfu sinnar sjálf, en hún segist hafa helgað sig tónlistinni. "Þetta er það sem ég einbeiti mér að. Ég legg aðaláherslu á að syngja á ensku og er full af innblæstri," segir hún og bætir við að nýju íslensku lögin hennar hafi komið henni sjálfri á óvart. Og hún er með á hreinu hvaðan öll þessi atorka kemur "Ég sit við kertið mitt, fer með bænirnar mínar og nota talnabandið mitt. Ég leita einnig í innhverfa íhugun en ég hef iðkað jóga síðan ég var lítil stelpa á Indlandi og líka alin upp við mikinn aga," skýrir Leoncie en hún er kaþólskrar trúar.

Leoncie hefur í nógu að snúast, er á þeytingi milli heimshorna og nú síðast var hún í viðtölum við erlenda sjónvarpsstöð og tímarit sem gera munu henni ágætis skil á alþjóðlegum vettvangi seinna í sumar.

Lætur ekki bjána angra sig

Um leið og Leoncie hefur laðað að sér aðdáendur í gegnum tíðina virðist hún einnig hafa eignast óvildarmenn. Hún lætur það samt ekki á sig fá. Þannig segir hún frá því þegar hún söng fyrir gesti á aðalsviðinu í miðbæ Reykjavíkur á þjóðhátíðardaginn: "Ég varð svo hissa á frábærum viðtökum áhorfenda minna, þau köllluðu sum: "Meira, meira, Leoncie!" Það var alveg frábært. En það voru líka einhverjir uppi við sviðið sem voru að reyna að hrella mig, einhver hópur af væsklum. Þeir héldu að þeir gætu komið mér úr jafnvægi en hverjum er ekki sama um hóp bjána þegar allur meginþorri áhorfenda er frábær." Þegar á móti blæs er Leoncie minnug kjörorða sinna sem hljóma hvað best á ensku: "I won't let anybody steal my thunder - no matter who they sleep with." Augljóst er að ef einhver ætlar að abbast upp á Leoncie ætti hinn sami að hugsa sig tvisvar um.

Hún lætur vel af vistinni hér á Íslandi en Leoncie er fyrir löngu orðin íslenskur ríkisborgari og gekk að eiga íslenskan mann fyrir hartnær tveimur áratugum. Hún segist þó hafa unun af að ferðast og kynna sér nýja menningarheima: "Mér finnst gaman að blanda geði við alls kyns fólk. Það víkkar sjóndeildarhringinn." Hún kveðst því að öllum líkindum munu flytja til annars lands, þó að hún segist ekki ætla að fara langt og ætlar alls ekki að segja skilið við Ísland.

Næstu vikurnar mun hún vinna að hljóðblöndun, frágangi og lokaupptökum fyrir Radio Rapist sem síðan er væntanleg í verslanir í lok ágústmánaðar.

asgeiri@mbl.is

www.leoncie-music.com

Nánar um málið
í Morgunblaðinu
Áskrifendur:
Lesa blaðið hér
Ekki með áskrift?
Skoða áskriftarleiðir
  • Til baka
  • Blogga um frétt
  • Senda