Hve háir eiga hælar á háhæluðum skóm eiginlega að vera? Hin virta vísindastofnun International Institute of Physics býður upp á stærðfræðilega formúlu að útreikningi á nákvæmlega réttri hælahæð, að því er greint er frá á fréttavef norska blaðsins Aftenposten.

Til grundvallar formúlunni er lögð skóstærðin, sem í útreikningnum er kölluð "s". Með því að setja þessa breytu í samhengi við mörkin á hættunni á að detta, reynslu af að ganga á háum hælum, og verðið, þá fæst út formúlan fyrir hinum fullkomnu skóm, að því er haft er eftir brezka eðlisfræðingnum Paul Stephenson.

Hættan á að detta, reynsla og innkaupsverð reiknast saman í breytuna Q, en nákvæmlega rétt hæð hælanna nefnist h. Formúlan hljóðar í heild þar með svona: h=Q(12+3s/8).

"Jafnvel þótt þetta kunni að virka flókið er þetta í rauninni sáraeinfalt," segir Stephenson. "Formúlan byggist á reglu Pýþagórasar um rétthyrnda þríhyrninginn, sem allir þekkja - eða ættu að þekkja - úr skólanum," bendir hann á. Stephenson hafnar öllum aðdróttunum um að hér sé aðeins fánýtt rugl á ferðinni. Formúlan geti einnig nýtzt t.d. konum sem vilji reikna út hve mikið áfengi þær þola að drekka án þess að missa jafnvægið á tilteknum háhæluðum skóm.