Lögreglustjórinn í New Riegel í Ohio vaknaði um miðja nótt við óvænt en falleg hljóð úr dagstofunni. Þegar lögreglustjórinn, Steve Swartzmiller, hafði seilst eftir marghleypunni og farið að athuga málið kom í ljós að við píanóið sat óboðinn gestur og spilaði Beethoven.

Gesturinn var Shawn Chadwell, 19 ára, veldrukkinn, við píanóið í stofunni. Í ljós kom að Chadwell hafði ætlað að heimsækja vin sinn en farið húsavillt.

Hann var ákærður fyrir ölvun undir lögaldri og innbrot. En Swartzmiller lét þess getið að túlkun Chadwells á Beethoven hafi verið óaðfinnanleg.