Ólafur Ragnar Grímsson og Dorrit Moussaieff koma við sögu í grein sem birtist í breska dagblaðinu Independent í gær. Í greininni gerir blaðamaður sér mat úr niðurstöðum sem birtust í nýjasta tölublaði hagfræðitímaritsins Labour Economics, en þar er staðhæft að sú tilhneiging karlmanna sem eiga velgengni að fagna, að velja sér eiginkonu sem lítið kveður að, sé á undanhaldi. Þvert á móti virðist hið fornkveðna sífellt eiga betur við, að sér sækjast um líkir.

Engu að síður er vitnað í skilnaðarlögfræðinginn Vanessu Lloyd Platt sem segir að við búum enn í karllægum heimi og að menn kunni því yfirleitt illa þéni eiginkona þeirra jafnmikið eða búi við jafngóðan orðstír og þeir.

Að sögn blaðamanns hafa þó „ekki allir karlmenn þá meðfæddu þörf að vera heldri aðilinn í sambandinu". Því til sönnunar eru nefnd knattspyrnumaðurinn Ashley Cole og söngkonan Cheryl Tweedy, og leikstjórinn Sam Mendes sem er giftur leikkonunni Kate Winslet. Og upptalningin heldur áfram:

„Jafnvel forseti Íslands, Ólafur Ragnar Grímsson, hefur krækt í hina glitrandi yfirstéttarkonu frá London, Dorrit Moussaieff, fasteignadrottningu og skartgripasala stjarnanna á Park Lane."