Rauði dregillinn var dreginn fram þegar stjörnurnar í Hollywood buðu David og Viktoríu Beckham velkomin til Los Angeles með formlegum hætti í gær. Leikararnir Tom Cruise og Will Smith voru gestgjafar teitis sem fram fór í Nútímalistasafninu í Los Angeles. Aðeins útvaldir Hollywood-liðar fengu boðskort í veisluna.
Leikstjórinn Ron Howard, leikarinn Bruce Willis og leikkonurnar Brooke Shields og Eva Longoria voru á meðal gesta.
Beckham lék sinn fyrsta leik með knattspyrnufélaginu Los Angeles Galaxy í vináttuleik gegn Chelsea á laugardag.
Tom Cruise, sem vinnur nú að gerð nýrrar kvikmyndar í Þýskalandi, flaug sérstaklega til Bandaríkjanna til þess að verða viðstaddur veisluna.