Fertugur hamborgari

Einn vinsælasti skyndibiti heims er fertugur í ár, uppskriftin er einföld, tveir litlir kjöthleifar úr hökkuðu nautakjöti, sósa, salatblað, ostsneið, súrar gúrkur, laukur og sérstök sósa með þremur brauðsneiðum með sesamfræi. Big Mac borgarinn sló samt ekki í gegn í fyrstu.

Jim Delligatti var að sögn Dagens Nyheter í tvö ár að sannfæra stjórnendur innan McDonalds hamborgarakeðjunnar að þessi nýi borgari ætti framtíð fyrir sér.

1967 hóf Delligatti fyrst að bjóða upp á fyrsta tvöfalda hamborgarann í McDonald’s útibúi sínu í Uniontown í Pennsylvaniu en það var ekki fyrr en á öðrum degi að honum datt í hug að setja þriðju brauðsneiðina á milli kjöthleifanna.

Nú fjörtíu árum síðar getur hann státað sig af því að hafa hannað einn af vinsælustu og mest keyptu skyndibitum í heimi.

Delligatti hefur reyndar hækkað verðið á borgaranum úr 45 sentum upp í tvo dali og 69 sent og McDonalds útibúunum hefur fjölgað úr eitt þúsund í 31 þúsund í ríflega hundrað löndum þar sem 550 milljón Big Mac borgarar eru seldir á ári hverju.

Í tilefni afmælisins mun Delligatti sem er orðinn 89 ára opna safn tileinkað Big Mac borgaranum.

• 2 blogg um fréttina

Bloggað um fréttina

• Rebbý: sem fyrrum starfsmaður ....
• Árni Gunnar Ásgeirsson: Fleiri heimskuleg söfn