Púað á Amy Winehouse á tónleikum

Gestir á tónleikum Amy Winehouse í Birmingham voru lítt hrifnir af frammistöðu söngkonunnar í gærkvöldi. Einhverjir yfirgáfu tónleikana og aðrir púuðu. Var Winehouse ofurölvi á tónleikunum og þurfti ítrekað stuðning hljómsveitarmeðlima þar sem hún stóð varla í fæturna.

Fyrr um daginn hafði hún heimsótt eiginmanninn í fangelsi og tileinkaði honum lögin á tónleikunum meðal annars með því að breyta textum laga.

Eiginmaður Winehouse, Blake Fielder, var handtekinn fyrir viku síðan vegna meintrar líkamsárásar Blake og kunningja hans á barþjón einn sem átti að bera vitni gegn Blake í sakamáli sem nú stendur yfir. Eftir líkamsárásina eru þeir kumpánar einnig grunaðir um að hafa reynt að múta fórnarlambinu með 200 þúsund pundum gegn því að hann félli frá fyrri vitnisburði.

• 2 blogg um fréttina

Bloggað um fréttina

• Vinir Ketils bónda, áhugamannafélag: Púað á Þóri Ólafsson á tónleikum
• Gísli Foster Hjartarson: Hún er grýtt leiðin á toppinn