Hljómsveitin Hraun er komin í 20 hljómsveita úrslit í tónlistarkeppni BBC world service sem nefnist The Next Big Thing. Í keppninni er leitað að björtustu vonum í röðum heimstónlistarmanna og tónlistar sem liggur utan garðs vinsældatónlistar.
Í tilkynningu kemur fram að nokkur þúsund listamenn frá 88 löndum kepptu í keppninni og koma þeir sem lentu í undanúrslitum m.a. frá Bandaríkjunum, Bretlandi, Tansaníu, Jamaica, Frakklandi, Singapore og Rússlandi.
Lag Hrauns, Ástarsaga úr Fjöllunum, er nú til spilunar á heimasíðu keppninnar, www.bbcworldservice.com/nextbigthing. Lagið er að finna á plötu Hrauns, I can't believe it's not happiness sem kom út í vor.