Jude Law mun hugsanlega leika í kvikmynd á Íslandi
Jude Law kemur kannski til Íslands í vor.
Sagt er frá því á fréttavef USA Today að kvikmyndin, Come Like Shadows, sem byggð er á leikritinu Macbeth eftir Shakespeare, verði að öllum líkindum tekin upp á Íslandi í vor. Jude Law hefur tekið að sér hlutverk í myndinni ásamt leikkonunni Tildu Swinton sem lék eftirminnilega í Narniu.
Tilda sagði frá þessu á árlegri hátíð kvenna í Hollywood, þar sem farið var yfir hlutverk kvenna í kvikmyndum í þeirri von að þau verði tilnefnd til Óskarsverðlauna. Í ár þóttu hlutverk kvenna frekar óbitastæð og voru flestar leikkonur í Hollywood ekki vissar um hverjar yrðu tilnefndar.
Angelina Jolie er sögð hafa staðið sig vel og sýnt afburðaleik í A Mighty Heart og gæti hún verið líkleg til tilnefningar.
Hlutverk Tildu í Come Like Shadows lofar góðu fyrir næsta ár, og Jodie Foster bindur vonir við hlutverk sitt í ævintýramyndinni, Nim´s Island, sem kemur út 2008.
