Timo Maas leikur fyrir Íslendinga á Nasa í kvöld.

„Ég ætti náttúrlega að koma miklu oftar en ég geri, því ég hreinlega elska Ísland. Það er alltaf brjáluð stemning hjá ykkur og fullt af fallegum stelpum, sem skemmir ekki fyrir. Íslendingar eru líka aðeins frábrugðnir hinum Evrópuþjóðunum og ég meina það á mjög jákvæðan hátt," segir Timo Maas og sötrar cappuccino-ið sitt í morgunsárið.

„Það er líka mjög gaman að skreppa til Íslands svona rétt fyrir jól." Timo er mjög hrifinn af íslenskum lakkrís, og ætlar að kaupa svolítið af honum til að gefa vinum og vandamönnum í Þýskalandi.