Madonna og Guy Ritchie heimsóttu fátækrahverfi í indversku borginni Mumbaí. AP

Madonna heimsótti fjölmennt fátækrahverfi í indversku borginni Mumbaí, þar sem íbúar hverfisins létu rigna yfir hana rósa-og morgunfrúarblöðum.

Madonna eyddi um 45 mínútum með íbúum hverfisins sem gáfu henni heimagerðar hálsfestar.  Hún var í fríi á Indlandi ásamt fjölskyldu sinni, en þau eyddu áramótunum í eyðimerkurhéraðinu Rajasthan.

Milljónir manna búa í kofum byggðum til bráðabirgða í fátækrahverfum Mumbaí.

Ástralski rithöfundurinn Gregory David Roberts fór með Madonnu og eiginmanni hennar Guy Ritchie um hverfið en Gregory hefur búið í hverfinu síðan á níunda áratugnum. 

Gregory gerði fátækrahverfið að athvarfi sínu eftir að hann slapp úr fangelsi í Ástralíu.  Hann hefur unnið með yfirvöldum Mumbaí og reisti þar heilsugæslustöð.

Fátækrahverfi þetta er sögusvið í Shantaram, metsölubók Roberts.  Kvikmynd byggð á bókinni er nú vinnslu en Johnny Depp mun leika aðalhlutverkið og verður henni leikstýrt af indverska leikstjóranum Mira Nair.