Leikkonunni Michelle Rodriguez hefur verið sleppt úr fangelsi eftir 17 daga vist en hún var dæmd til sex mánaða afplánunar fyrir skilorðsbrot.

Sagt er frá því á fréttavef Reuters að leikkonan, sem lék í Lost þáttunum, hóf afplánun sína þann 23.desember síðastliðinn.   

Hún var dæmd í sex mánaða fangelsi fyrir að virða ekki skilorðsbundinn dóm sem hún hlaut fyrir ölvunarakstur fyrir nokkru síðan.

Þann 10. október síðastliðinn var hún svo fundin sek um að brjóta skilorð, meðal annars með því að neyta áfengis eftir að dómari hafði bannað henni það.

Rodriguez hefur haft heppnina með sér hvað varðar refsikerfið í Los Angeles.  Hún var dæmd í fangelsi í 60 daga fyrir skilorðsbrot í maí 2006 en var laus eftir aðeins fjóra klukkutíma og 20 mínútur.

Fleiri stjörnur á borð við Lindsay Lohan, Nicole Ritchie og Paris Hilton afplánuðu aðeins brot af dómum sínum í fyrra, sem hefur vakið upp spurningar um sérmeðferð Hollywood stjarna. 

Kiefer Sutherland hóf hins vegar 48 daga afplánun sína þann 5. desember síðastliðinn fyrir ölvunarakstur og búist er við að hann afpláni hana að fullu.