Börn eru hrædd við trúða
Niðurstöður nýrrar könnunar sem vísindamenn í Bretlandi gerðu meðal barna leiða í ljós að börnum þykir ekki gaman að trúðum, og eldri krakkar eru jafnvel hræddir við þá. Börnin sem tóku þátt í könnuninni voru á aldrinum fjögurra til 16 ára.
Markmiðið með könnuninni, sem greint er frá í nýjasta hefti tímaritsins Nursing Standard, var að kanna með hvaða hætti væri unnt að bæta umhverfi á barnadeildum sjúkrahúsa. Þátttakendur í könnuninni voru 250 börn sem dvelja á barnadeildum.
„Við komumst að því að ekkert barn hafði gaman af trúðum. Sum voru hrædd við þá og skildu þá ekki,“ sagði Penny Curtis, lektor við Háskólann í Sheffield, þar sem könnunin var gerð. „Fullorðið fólk er gjarnt á að telja sig vita hvað börnum fellur í geð.“
