Vinnur fyrir Morten Harket

Íslenski upptökumaðurinn Addi 800 hefur unnið tónlist fyrir næstu sólóplötu norska tónlistarmannsins Morten Harket.

„Þegar svona stórstjörnur eru að vinna plötu eru kannski nokkrir látnir vinna hvert lag og svo er bara valin ein útsetning úr þeim hópi, eða laginu jafnvel sleppt af plötunni. Ég er ekki búinn að fá neinar fréttir um hvort lagið sem ég vann verður notað á plötuna eða ekki. En þeim leist vel á þetta hjá mér og mér hefur verið falið annað lag eftir Morten til að hljóðblanda,“ segir Addi sem hefur þó aldrei hitt norsku stórstjörnuna sem varð fyrst frægur með hljómsveitinni A-ha.