Ásdís Rán gæti unnið tugi milljóna

„Ef ég kemst áfram og vinn þessa milljón dollara mun ég fjárfesta skynsamlega og gefa 10% af upphæðinni til góðgerðarmála. Þá hugsa ég helst til Styrktarsjóðs langveikra barna og málefna eins og brjóstakrabbameins. Ég vil allavega láta eitthvað gott af mér leiða ef ég vinn,“ segir fyrirsætan og athafnakonan Ásdís Rán Gunnarsdóttir, en hún er nú skammt frá sigri í fyrirsætukeppninni Hot for the money sem fram fer á heimasíðunni www.isshehot.com.

„Þetta er hjá fyrirtækinu savvy.com, sem er vinsæl afþreyingarsíða fyrir karlmenn. Þarna fer fram val á ´The million dollar woman´ og er leitað að réttu stelpunni sem er bæði falleg og gáfuð. Í hverjum mánuði ársins er ein kona kosin og í lokin komast sigurvegarar hvers mánaðar í raunveruleikaþætti þar sem vinningsupphæðin er 67 milljónir íslenskra króna.“

„Ég er rosalega stolt af því að vera svona ofarlega, enda tugir flottra stúlkna í keppninni. Nú þarf ég bara að treysta á að allir fari og kjósi áður en lokað verður á kosningu á morgun. Ef svona 50 manns kjósa mig næ ég örugglega að vinna,“ segir Ásdís að lokum. Hægt er að gefa Ásdísi atkvæði sitt á vefsíðunni www.isshehot.com.