Brjóst fyrir eina milljón

Mikil stemmning var á brjóstauppboði í Saltfélaginu í gær. Allt að 300 manns mættu og keyptu hekluð brjóst fyrir um eina milljón króna, sem gefin var fiðrildaátaki UNIFEM, sem haldið er til styrktar konum í Líberíu, Súdan og Lýðveldinu Kongó.

Þetta kemur fram í fréttatilkynningu frá UNIFEM á Íslandi.

Brjóstin sem boðin voru upp voru búin til í aðdraganda sýningarinnar Gyðjan í vélinni sem Vatnadansmeyjafélagið Hrafnhildur setti upp síðasta sumar. 25 handverkskonur á aldrinum 18-88 ára hekluðu um 250 brjóst en þau voru af öllum gerðum: Lítil, stór, skökk, sigin og stinn í alls konar litum.

„Kunnum við hjá UNIFEM öllum sem að uppboðinu komu bestu þakkir; handverkskonunum sem bjuggu til brjóstin af alúð, Vatnadansmeyjunum sem mættu í fullum skrúða og buðu brjóstin röggsamlega upp af mikilli gleði, listamönnum sem fram komu og þeyttu lúðra og Saltfélaginu sem lánaði húsnæði undir herlegheitin.“

• 3 blogg um fréttina

Bloggað um fréttina

• Hlynur Hallsson: Til hamingju með daginn, konur og karlar!
• Bjarkey Gunnarsdóttir: Gegn ofbeldi
• Heimir Lárusson Fjeldsted: Karlar með brjóstauppboð.