Gæslan leikur í kvikmynd

Tökur á kvikmyndinni Brim standa nú yfir um borð í bátnum Jóni á Hofi úti á Faxaflóa. Í dag voru liðsmenn Landhelgisgæslunnar í aðalhlutverki því varðskipið Týr og ein af þyrlum gæslunnar tóku þátt í nokkrum atriðum í myndinni.

Leikstjórinn Árni Ólafur Ásgeirsson sagði að það hefði verið mjög gaman að leikstýra svo flóknu atriði og sagði Landhelgisgæsluna ákaflega lipra og hjálpsama. Í dag var hann með tvö tökulið, tvær þyrlur og heilt varðskip í vinnu.

„ Landhelgisgæslan gerir bara allt fyrir okkur. Við vorum með Tý og þyrlu frá gæslunni og mynduðum bæði af Jóni á Hofi og úr annarri þyrlu sem við vorum með og þetta er búið að vera mjög flókið allt saman en ganga mjög vel samt," sagði Árni Ólafur í samtali við Fréttavef Morgunblaðsins. 

 „Þetta er búinn að vera alveg crazy dagur og hann er ekki búinn enn," sagði Árni Ólafur. Hann sagði að Gæslan liti á þetta sem æfingu hjá sér en þeir æfa að sjálfsögðu reglulega með þyrlum á Faxaflóa og því þótti vel til fundið að slá tvær flugur í einu höggi og liðsinna kvikmyndagerðarmönnum um leið og æft er.

En tók gæslan leikstjórn? „Já, já, þeir gerðu allt sem ég bað þá um," sagði Árni Ólafur að lokum. 

• 2 blogg um fréttina

Bloggað um fréttina

• Solveig Pálmadóttir: Stolt af stráknum mínum!
• Gísli Torfi: sko mína menn