Á laugardag var haldið upp á ársafmæli Vatnasafnsins í Stykkishólmi en safnið var opnað laugardaginn 5. maí 2007 og hafa rúmlega sjö þúsund gestir komið í safnið á þeim tíma sem liðinn er frá opnun þess. Afmælisdagskráin var vel sótt og bekkurinn þétt setinn af gestum víða að úr heiminum en meðal þeirra var söngkonan Björk Guðmundsdóttir, að því er segir í frétt Skessuhorns.
Listakonan Roni Horn var viðstödd afmælisdagskrána en Vatnasafnið hýsir verk listakonunnar, og það var líka James Lingwood framkvæmdastjóri Art Angel samtakanna sem fjármagna verkefnið með stuðningi mennta- og samgönguráðuneyta og Stykkishólmsbæjar, að því er segir í frétt Skessuhorns.