Út er kominn kassi með fimm geislaplötum sem sagðar eru innihalda 100 bestu lög lýðveldisins. Það er Sena sem gefur safnið út, en 30 einstaklingar voru fengnir til að velja þau 30 lög sem þeir töldu bestu lög íslenskrar dægurtónlistar, og voru 100 lög svo tekin úr þeim niðurstöðum. Sérstaka athygli vekur að Bubbi Morthens á flest lög í safninu, en hann er flytjandi 10 laga á plötunum, ýmist einn eða með hljómsveit. Þá eru 12 laganna flutt á ensku, eða 12%, sem verður að teljast nokkuð merkileg tölfræði. Það skýtur hins vegar nokkuð skökku við að þekktustu tónlistarmenn Íslandssögunnar, Björk og Sigur Rós, eigi ekkert lag í safninu. Á því er þó eðlileg skýring; þau vildu hreinlega ekki eiga lög á plötunum.