Hægt er að bjóða í líf Ian Usher á uppboðsvef eBay. Eftir tólf ára hjónaband sem endaði með erfiðum skilnaði vill hann söðla um og hefja glænýtt líf. Fyrir íbúðina, vini og vinnu vonast Usher til að fá um 30 milljónir króna.

Hægt er að bjóða í þriggja herbergja íbúðina hans í Perth í Ástralíu, auk alls innbús, bílinn hans, mótorhjól, sjóskíði og fallhlífabúnað. Hann býður einnig upp kynningarfund með vinum sínum (sem samþykktu að taka þátt) og viðtal fyrir starfið sitt. „Þegar allt er selt vil ég ganga í burtu með ekkert nema veskið í vasanum og vegabréfið í hendinni,“ segir Usher. Hann ætlar síðan út á flugvöll og upp í næstu vél.