Hljómsveitin Sigur Rós er um þessar mundir á tónleikaferðalagi um Evrópu, en sveitin hélt tónleika í Köln í Þýskalandi í gær, og heldur aðra í Wiesbaden í kvöld.

Í byrjun þessa mánaðar var sveitin stödd í Ástralíu, en þar hélt hún tónleika í Melbourne í Sydney og Byron Bay. Upphaflega stóð til að hljómsveitin Amiina myndi leika með sveitinni á umræddum tónleikum, en ekkert varð af því. Á bloggi Sigur Rósar segir John Best, umboðsmaður sveitarinnar, að á þessu sé einföld skýring; María Huld Markan Sigfúsdóttir, meðlimur Amiinu, eigi von á barni og hafi því ekki viljað sitja í flugvél í heilan sólarhring til þess að koma fram á þrennum tónleikum á þremur dögum, og fljúga svo í annan sólarhring til að komast aftur heim.

„Amiina mun aðeins koma fram á nokkrum tónleikum með Sigur Rós í Evrópu á næstunni, og svo er þetta bara allt búið,“ skrifar Best meðal annars á bloggsíðunni.

Svo skemmtilega vill til að unnusti Maríu er Kjartan Sveinsson, hljómborðsleikari Sigur Rósar.

Gleymdi textanum

Fleira skemmtilegt kemur fram á bloggi umboðsmannsins. Þannig segir hann frá því hvernig hann hafi húðskammað meðlimi Sigur Rósar fyrir tónleikana í Sydney, því þeir hafi ekki viljað fara að ráðum hans um að breyta lagalistanum á tónleikunum. Eftir tónleikana hafi hann hins vegar verið svo stoltur af frammistöðu þeirra að hann hafi næstum því séð ástæðu til að biðja þá afsökunar.

Þá rifjar hann einnig upp tónleika sveitarinnar í Arras í Frakklandi hinn 6. júlí, en þar gleymdi Jónsi textanum í laginu „Inní mér syngur vitleysingur“. Söngvarinn bjargaði sér þó fyrir horn með því að syngja m.a. textabrotin „... búinn að gleyma textanum...“ og „... enginn skilur neitt...“.

Sjá má uppákomuna á YouTube.