Jákvæð hugsun skilar miklu
„Eins og ástandið er í dag myndi Brian Tracy líklega segja okkur að anda djúpt,“ segir Rósa Traustadóttir, leiðbeinandi fyrir Brian Tracy International, en hún starfrækir stofuna Hugform sem býður upp á ýmis námskeið. Mikilvægt sé að fara vel yfir stöðuna, hlusta á það sem aðrir hafa að segja og forðast að taka handahófskenndar ákvarðanir.
„Lykilsetning í fræðum Brians Tracys er: Gerðu það sem þú getur með það sem þú hefur. Reynum síðan að hafa ekki of miklar áhyggjur af hinu.“ Hún segir það mikilvægt að fólk horfi til framtíðar, skoði hvar það standi nú og finni stökkpallinn. Auðvitað þurfi að skoða af hverju við séum þar sem við erum en fyrst og fremst þurfi að horfa fram á við án þess að eyða of mikilli orku í að finna sökudólgana. Nú þurfi yfirmenn að peppa starfsfólk sitt upp og halda í jákvæðnina.
Að finna það mikilvæga
„Það er lykilatriði að byggja sig upp því gott sjálfsmat stýrir miklu í manns eigin lífi,“ segir Rósa. „Góður stjórnandi hefur gott sjálfsmat og hann getur byggt upp starfsfólkið og fengið fram það besta úr því, meðal annars með hrósi fyrir það sem vel er gert,“ segir hún. Ávallt sé mikilvægt að huga vel að mannlegum samskiptum, hvort sem það er á vinnustaðnum eða annars staðar. „Það skiptir miklu að vera leikinn í mannlegum samskiptum. Vera jákvæður, hlusta á aðra og vera ófeiminn við að brosa.“Það sem máli skiptir
Þá þurfi fólk að gera sér grein fyrir því sem mestu máli skiptir. Brian Tracy segi að það sé fjölskyldan sem sé í 1. sæti. Þarfir hennar komi fyrst og um þessar mundir sé mikilvægt að vera meðvitaður um það.„Við skulum vera þakklát fyrir það sem við höfum og taka utan um okkar nánustu, byggja þau upp en forðast að rífa þau eða okkur sjálf niður.Maður á líka að taka ábyrgð á gjörðum sínum og í ljósi þess sem nú er að gerast í samfélaginu er þetta mjög mikilvægt,“ segir Rósa. Þetta beri öllum að gera.
