Í ástralska dagblaðinu Herald Sun í dag er að finna nokkra brandara á kostnað bankamanna í kreppunni og eru sumir þeirra með íslenskum áherslum.

Erfitt getur verið að snara orðaleikjum svo vel sé en hér koma nokkrir af þessum bröndurum sem ganga á meðal galgopa innan bankageirans:

Bankakreppan hefur hjálpað mér að koma undir mig fótunum sagði bankamaðurinn sem þurfti að selja bílinn.

Hver er höfuðborg/höfuðstóll íslands?  Um $1,50.

Hvað eiga íslenskir bankamenn og stripplingar sameiginlegt?  Þeirra dýrustu djásn hafa verið fryst.

Framkvæmdastjóri fyrirtækis hélt samkeppni um sparnað innan fyrirtækisins vegna kreppunnar og voru 100 dalir í verðlaun. Verðlaunin hlaut millistjórnandinn sem stakk upp á því að verðlaunin yrðu lækkuð í 10 dali.

Hvernig skilgreinir þú bjartsýni?
Bankastarfsmann sem straujar fimm skyrtur á sunnudegi.

Hver er munurinn á bankamanni og stórri flatböku? Flatbakan getur mettað/brauðfætt fjögurra manna fjölskyldu.

Hvers vegna eru fasteignasalar hættir að líta út um gluggann á morgnanna? Því annars hafa þeir ekkert að gera eftir hádegi.

Hvað segir maður við áhættusjóðsstjóra sem getur ekki losað sig við verðlaus verðbréf?
Einn hamborgara með frönskum takk.

Hvort er verra, bankakreppan eða skilnaður?
Bankakreppan, í henni missir maður helming eignanna en situr uppi með konuna.

Bankinn endursendi ávísun frá mér með orðunum að ekki væri næg innistæða fyrir henni.
Á það við mig eða bankann?