Óhætt er að segja að á meðal tónlistarmanna landsins sé Óskar Bergsson, borgarráðsmaður Framsóknarflokks og formaður borgarráðs, óvinsælastur stjórnmálamanna. Óskar lét hafa það eftir sér í viðtali við vísi.is að ein ástæðan fyrir því að Reykjavíkurborg myndi ekki styrkja krepputónleikana frekar væri að tónleikarnir væru í einhverjum tilvikum útgáfutónleikar þeirra listamanna sem þar komu fram. Jakob Smári Magnússon bassaleikari lék undir með Bubba Morthens í Höllinni og reit þetta á bloggsíðu sína og undir hans orð taka margir:
„Mig langar [...] að benda Óskari á að tónlistamenn eru ekki haldnir sömu siðblindu og stjórnmálamenn. Það var enginn þarna [...] að halda útgáfutónleika. Þarna voru menn ekki að misnota aðstöðu sína eða aðstæður í markaðslegum tilgangi. Við vorum bara að láta gott af okkur leiða. Við gerum þetta oft. Það eru ófá skiptin sem tónlistarmenn eru kallaðir til þegar styrkja þarf gott málefni. Og þá erum við alltaf reiðubúnir. [...] Það vill nefnilega þannig til að íslenskir tónlistarmenn eru fullfærir um að halda sína útgáfutónleika án styrkja frá hinu opinbera. (Nema kannski Melabandið). Íslenskir tónlistarmenn hafa mikinn metnað og afgreiða ekki útgáfutónleika með því að mæta í Laugardalshöll og flytja 2-4 lög eins og gert var [á laugardag].