Breskur læknir við sjálfboðastörf í Kongó studdist við leiðbeiningar á SMS formi frá samstarfsmanni sínum í Bretlandi þegar hann þurfti að fjarlægja vinstri handlegg drengs sem hafði verið illa bitinn af flóðhesti.

Skurðlæknirinn David Nott var staddur á spítala í Rutshuru á vegum samtakanna Læknar án landamæra. Handleggur drengsins, sem er 16 ára, var illa sýktur eftir bitið og gerði Nott sér ljóst að án aðgerðarinnar myndi drengurinn láta lífið innan þriggja daga.

Nott hafði aldrei framkvæmt skurðaðgerð sem þessa áður og hafði því samband með SMS-i við vanan samstarfsmann sinn á Charing Cross spítalanum í London.

Sá sendi honum ítarlegar leiðbeiningar á SMS formi um hvernig ætti að bera sig að. Nott sagðist hafa hugsað sig vel og lengi um hvort rétt væri að skilja drenginn eftir með aðeins einn handlegg í miðri óöldinni sem ríkir í Kongó. „En á endanum hefði hann látist án skurðaðgerðarinnar svo ég dró djúpt andann og fylgdi leiðbeiningunum ítarlega.“

Nott hafði aðeins aðgang að rúmum hálfum lítra af blóði og frumstæðum skurðtækjum en aðgerðin, sem var framkvæmd í október, tókst vel og náði drengurinn fullum bata.