Nær ein af hverjum tveimur konum vill frekar vera án kynlífs í tvær vikur en vera án aðgangs að netinu, samkvæmt könnun sem birt var í dag.
Um 46% kvenna sem tóku þátt í könnuninni sögðust frekar vilja vera án kynlífs en aðeins um 30% karla tóku netið fram yfir kynlíf. Alls tóku 2.119 manns þátt í könnuninni sem netrannsóknafyrirtækið Harris Interactive gerði fyrir Intel, stærsta örgjörvaframleiðanda heims.
Um 95% aðspurðra sögðu að það væri „mjög mikilvægt, mikilvægt eða nokkuð mikilvægt“ að hafa aðgang að netinu.
65% sögðu mikilvægara að nota peninga í netaðgang en í sjónvarpsáskriftir (39% töldu þær mikilvægari), borða úti (20% töldu það mikilvægara), fatakaup (18%) eða árskort í líkamsræktarstöð (10%).