Tyrkneski skósmiðurinn Ramazan Baydan fullyrðir að skórnir sem reynt var að fleygja í höfuðið á George W. Bush Bandaríkjaforseta hafi verið hans framleiðsla, af gerðinni Ducati Model 271.

Ekki er hægt að sannreyna fullyrðinguna, öryggisverðir sprengdu skóvopnin frægu í tætlur og skotmaðurinn, íraski fréttamaðurinn Muntader al-Zaidi, er í haldi. En Baydan græðir á tá og fingri því að „Bush-skórnir“ njóta nú gríðarlegra vinsælda.