Furðar sig á vinsældum sínum hjá hinu kyninu

Fyrrverandi eiginkona Pauls McCartneys, Heather Mills, segist margoft fá boð um stefnumót og að það komi sér og vinum sínum óskaplega mikið á óvart hversu mikillar athygli hún njóti á meðal hins kynsins.

„Ég á svo margar fallegar vinkonur sem eiga í mestu vandræðum með að næla sér í kærasta. Þegar ég fer út á lífið þyrpast karlmenn í kringum mig með boð um stefnumót. Vinkonur mínar eru ávallt jafn hlessa og furða sig á þessu, en ég tel að ástæðuna sé að finna í því hversu örugg ég er með sjálfa mig.“ Mills, sem hefur verið orðið við hinn 36 ára líkamsræktarþjálfara Jamie Walker, fjárfesti á dögunum í 2,5 milljóna punda íbúð í London. Að sögn kunningja hennar fékk hún íbúðina á spottprís því ásett verð var fjórar milljónir punda.

Heather keypti íbúðina með öllu innbúinu svo hún þarf einungis að flytja fötin sín og matinn í ísskápnum. Heather á fyrir fjögurra milljóna punda íbúð í New York og tvö heimili í East Sussex, strandhús og sveitabæ nálægt fyrrverandi eiginmanni sínum í Peasmarsh.

Við skilnað hennar og McCartneys fékk Mills um 24 milljónir punda í sinn hlut svo hún er ekki á flæðiskeri stödd eins og sagt er.