Sigurhljómsveit Músíktilrauna 2008, Agent Fresco, hitaði upp fyrir úrslitakeppnina. Ljósmynd/Björg Sveinsdóttir

Undanfarið hafa hljómsveitir ungmenna víða að keppt sín á milli í hljómsveitakeppninni Músíktilraunum, sem er nú haldin í 27. sinn. Nú er hafin í Listasafni Íslands - Hafnarhúsinu úrslitakeppni ellefu hljómsveita af þeim 42 sem kepptu í undanúrslitum, en keppninni er útvarpað beint á Rás 2.

Sérstök dómnefnd velur þær hljómsveitir sem hreppa fyrsta, annað og þriðja sætið, en viðstaddir í Hafnarhúsinu og áheyrendur Rásar 2 um allt land kjósa Hljómsveit fólksins sem einnig verður verðlaunuð. Sigursveit Músíktilrauna 2009 fær 20 hljóðverstíma í hljóðveri Sigur Rósar, Sundlauginni, ásamt hljóðmanni, flugmiða og fleiri verðlaun, fyrir annað sæti fást 20 hljóðverstímar í Gróðurhúsinu auk fleiri verðlauna og sveitin sem hreppir þriðja sætið fær ZOOM H4 upptökutæki frá Tónastöðinni meðal annars. Hljómsveit fólksins fær að launum upptökuhelgi í Island Studios, Vestmannaeyjum, ásamt hljóðmanni og gistingu og fleiri verðlaun. Efnilegustu hljóðfæraleikarar verða líka verðlaunaðir og veitt verða sérstök verðlaun fyrir textagerð á íslensku.

Í dómnefnd Músíktilrauna 2009 eru Árni Matthíasson, Alexandra Kjeld, Arnar Eggert Thoroddsen, Hildur Guðný Þórhallsdóttir, Kristján Kristjánsson, Margrét Erla Maack og Ragnheiður Eiríksdóttir.