„Jade elskaði athyglina"
Jade Goody með indversku leikkonunni Shilpa Shetty sem hún lenti í útistöðum við í breskum raunveruleikaþætti í sjónvarpi. Reuters
Max Clifford, fyrrum fjölmiðlafulltrúi bresku sjónvarpsstjörnunnar Jade Goody, segir hana hafa verið hæfileikalausa og að hún hafi gert sé grein fyrir því. Þá segir hann að mjög hafi færst í vöxt í Bretlandi á undanförnum áratug að fólki hafi skotið upp á stjörnuhimininn án þess að það væri gætt neinum sérstökum hæfileikum. Þetta kemur fram á fréttavef Sky.
Clifford segir að þegar hann hafi verið að alast upp hafi fólk þurft að hafa eitthvað sérstakt fram að færa til að öðlast frægð. Nú þurfi fólk hins vegar ekki á neinum sérstökum hæfileikum að halda til að öðlast auð og frægð og Jade hafi verið dæmi um það.
„Jade var engum sérstökum hæfileikum gædd. Hún hefði sjálf orðið fyrst til að viðurkenna það. Hún var bara hún sjálf,” segir hann en Jade lést úr krabbameini fyrr á þessu ári.Þá segir Clifford að frægð geti orðið að fíkn sem sé jafn hættuleg og áfengis og kókaínsfíkn og að Jade hafi elskað alla athygina sem veikindi hennar vöktu.
Það vakti hörð viðbrögð í síðasta mánuði er sjónvarpsmaðurinn Sir Michael Parkinson sagði að Goody hefði verið tákngervingur alls þess sem ekki í ólagi í Bretlandi.
