Kate Winslet. Reuters

Breska leikkonan Kate Winslet hefur höfðað mál á hendur breska dagblaðinu Daily Mail, en blaðið birti grein þar sem því er haldið fram að Winslet hafi logið til um þá líkamsrækt sem hún verði að stunda til að halda sér í formi. Winslet krefst 150.000 punda í skaðabætur.

Fram kemur í dómsskjölum að Winslet, sem er 33 ára, bæði skammist og sé miður sín vegna greinarinnar. Hún höfðaði málið fyrir dómstólum í London.

Winslet heldur því fram að mannorð hennar hafi beðið hnekki. Hún fer einnig fram á að bannað verði að endurbirta greinina.

Fram kemur að dagblaðið hafi ekki samþykkt að banna endurbirtingu.

Fyrirsögn greinarinnar er „Ætti Kate Winslet að fá Óskarsverðlaun fyrir að vera mest pirrandi leikkonan?“ Því er haldið fram að leikkonan hafi dregið mjög úr því hversu mikla líkamsrækt hún verði að stunda til að halda sér í formi.

Í greininni er sett spurningarmerki við ummæli sem Winslet lét falla í viðtali við tískublaðið Elle. Þar segir: „Ég fer ekki í ræktina því ég hef ekki tíma til þess, en ég stunda Pilates-æfingar heima hjá mér af DVD-diskum í 20 mínútur eða meira á hverjum degi.“

Winslet er sérstaklega ósátt við hvað greinin er illkvittin og særandi.