Spennan í garð söngvakeppninnar sem allir hata að elska og allir elska að hata fer nú stigvaxandi með degi hverjum. Nú er endalaust skrafað og skeggrætt um það hver hljóti nú hnossið og hefur hið framsækna fyrirtæki Google – að sjálfsögðu – reynt að tækla þessa óvissu með vísindalegum hætti. Forritarar þar hafa nú hannað síðu eða veftól sem segir fyrir um sigurvegara með því að safna saman leitartölum á bak við hvern og einn keppanda. Þarfaþingið má nálgast á: www.google.com/eurovision.

Eins og staðan er akkúrat núna er það hin þokkafulla Hadise frá Tyrklandi sem yrði sigurvegari en tiltölulega fast á hæla henni kemur Norðmaðurinn Alexander Rybak sem hefur auk vefleitar alla helstu veðbankana og fræðinga á bak við sig. Grikkinn olíuborni, Sakis, er svo í þriðja sæti.

Tólið þarf þó að taka með drjúgum fyrirvara samkvæmt Evróvisjóngreininingardeild Morgunblaðsins. Athuga ber að helmingsvægi stiga í úrslitunum liggur hjá dómnefndum og Google getur eðlilega ekki spáð um slíkt, eins og reyndar er tekið fram á síðunni. Gæti þessi góða spá fyrir Tyrkland líka mögulega stafað af því að Tyrkir séu óvenjuáhugasamir og liggi því á netinu nótt sem dag?

Samkvæmt spánni er Ísland líka í 35. sæti sem er auðvitað nóg til að lýsa algjöru frati á veftólið.