Spjallþáttadrottningin Oprah Winfrey er einn þeirra íbúa í suðurhluta Kaliforníu sem þurfti að bjarga verðmætum úr húsi sínu vegna ótta við skógarelda. Oprah er að vísu stödd í Chicago þar sem þáttur hennar var tekinn upp fyrir helgi, en starfsfólk hennar og flutningamenn tæmdu húsið á mettíma.

Glæsihýsi Opruh er í Montecito en íbúum svæðisins hefur ekki verið gert skylt að yfirgefa hús sín. Hins vegar er viðbúnaðarstig hátt.

Eldarnir kviknuðu á þriðjudag og mögnuðust fljótt, enda hefur verið afar heitt í lofti og hvasst á svæðinu. Áætlað er að um 3.500 hektarar skóglendis hafi brunnið. Slökkviliðsmenn í Kaliforníu eru nú óðum að ná tökum á eldunum en yfirvöld eru þó enn uggandi og vara við að eldarnir geti blossað upp á ný, enda erfiðar veðurfarsaðstæður með miklum sviptingum í vindáttinni.

Um 4.000 slökkviliðsmenn hafa barist við eldana og þyrlur hafa verið notaðar við slökkvistarfið.